14 მაისს მეფე თამარის ხსენების დღე, ხოლო 15 მაისს შოთა რუსთაველის დღე აღინიშნება. ამ თარიღებთან დაკავშირებით, ხელნაწერთა ეროვნულ ცენტრი გთავაზობთ საგამოფენო-საგანმანათლებლო პროგრამას – „თამარი და „ვეფხისტყაოსანი“ – ხელნაწერთა კვალდაკვალ“, რომელიც მიზნად ისახავს ქართული კულტურული მემკვიდრეობის უმნიშვნელოვანესი ისტორიულ-ლიტერატურული ძეგლების წარმოჩენას.

პროგრამის ფარგლებში გაიხსნა გამოფენა, სადაც წარმოდგენილია განსაკუთრებული ისტორიულ-კულტურული მნიშვნელობის ხელნაწერები, მათ შორის: მეფე თამარის ავტოგრაფი, „ქართლის ცხოვრების“ მაჩაბლისეული ხელნაწერი, ვახტანგ VI-ის მინაწერი თამარის ცხოვრების შესახებ, უორდროპების კოლექციის ფრაგმენტი „ვეფხისტყაოსნის“ მინიატურით, მიხაი ზიჩის მიერ „ვეფხისტყაოსნისთვის“ შექმნილი ილუსტრაციები, ვახტანგ VI-ის სტამბაში 1712 წელს დაბეჭდილი პირველი ნაბეჭდი „ვეფხისტყაოსანი“ და სხვა უნიკალური მასალა.

საგანმანათლებლო პროგრამა განკუთვნილია სკოლის მოსწავლეებისათვის და მოიცავს მრავალფეროვან შემეცნებით, ინტერაქციულ აქტივობას. ვიზიტორებს შესაძლებლობა ეძლევათ მონაწილეობა მიიღონ „ვეფხისტყაოსნის“ წერეთლისეული ხელნაწერის მიხედვით მომზადებული ფაზლის აწყობაში, ჩაერთონ ჯგუფურ შეჯიბრში, დაესწრონ თამარის ეპოქის ხელნაწერებზე დაფუძნებული ანიმაციური ვიდეოს ჩვენებას, გაეცნონ „ვეფხისტყაოსნის“ წერეთლისეული ხელნაწერის ისტორიის ამსახველ გრაფიკულ ვიდეომასალას, ასევე გადაიღონ სამახსოვრო ფოტო მიხაი ზიჩის ილუსტრაციის მიხედვით შექმნილ დეკორაციასთან პროექტის ფარგლებში – „გახდი თამარის თანამედროვე“.

გამოფენა 14 მაისს გაიხსნა. გახსნის ცერემონიას ესწრებოდნენ გურამ დოჩანაშვილის სახელობის საერთაშორისო ქართული სკოლის IX კლასის მოსწავლეები, რომელთა მონაწილეობამ განსაკუთრებულად გამოკვეთა პროგრამის საგანმანათლებლო დანიშნულება და ახალგაზრდა თაობის ეროვნული კულტურული მემკვიდრეობისადმი ინტერესის გაღრმავების მნიშვნელობა.

გამოფენა დამთვალიერებლებისთვის 29 მაისის ჩათვლით გაგრძელდება.